El Radio 9090 FM
#
زى ما بؤلك كده| الوشوش التى يرتديها الناس فى تعاملاتهم اليومية

زى ما بؤلك كده| الوشوش التى يرتديها الناس فى تعاملاتهم اليومية

تحدثت الإعلامية إسعاد يونس فى برنامجها "زى ما بؤلك كده" المذاع على الراديو 9090 عن الأقنعة المزيفة والوشوش التى يرتديها الناس فى تعاملاتهم اليومية.

وقالت "تصدقوا بالله التقيت فى بلاد بره حاجة عجيبة جدًا، الناس هناك بيقابلوا بعض بوش صباح الخير، آه والنعمة زى ما بؤلك كده"، الناس بيبتسموا فى وش بعض من غير سابق معرفة، عينه تيجى فى عينك يروح مبتسم وأنت تبتسم وكل واحد يكمل طريقه بس ببساطة وحلو، لا بيعتبروا ده تحرش ولا دماغهم تحدف شمال ولا يمين.. لا تخرج قبل أن تقول سبحان الله".

وتابعت: "التصرف المريب ده من المخلوقات العجيبة دى خلانى أفكر شوية فى حال البشر فى بلادنا، النفر من دول يقوم من النوم ويتسند ويتمطع كده ويقف قصاد المراية كده يمارس مهمة كل يوم.. يا ترى الوش اللى هلبسه للناس فى اليوم المشرق ده إيه! مبدئيًا وش البومة، ده الوش البيزك الأساسى اللى بيتلبس أول اليوم ونص اليوم وأخر اليوم الوش اللى هتقابل بيه مخاليق ربنا، بداية من التعساء من جيرانك اللى هيصطبحوا بيك على السلم أو الأساسنسير مرورًا ومراتك وعيالك وأى حد هيحطه حظه الأسود فى طريقك لأى سبب وأنت مش عاوز منه مصلحة".

وأضافت يونس: "وش الجلياط، ده وش ضرورى ما يستغناش عنه أى موظف أو عامل وش الجلياط يكسبك قدر من السماكة واللزوجة، يخليك أشبه بطاجن البامية باللية البايت فى التلاجة من 4 أسابيع، ويكسب قفاك طول مضاعف وعرض أقرب لسيقان أشجار البلوط، متخيل المنظر.. وش الجلياط يخليك تجيد الجليطة لكل من لك مصلحة معاه أو عنده ومسح الجوخ وإجادة فنون النفاق لمديرك وللعملا وللمدرسين وحتى للكتكوتة اللى بتمارس أزمة منتصف العمر معاها".

وأوضحت "وش الجلياط، ولو إنه الفرق نقطة إلا إن فرق التأثير كبير جدًا عن الوش اللى قبل منه، وش الجلياط هو عكس وش الحلياط تمامًا وده الوش اللى بتلبسه بمجرد ما تنقضى مصلحتك مع أى كائن حى كان لك عنده مصلحة، يعنى مديرك اللى كنت لسه من خمس دقايق بتتحليط لو طلع معاش فى نفس اللحظة اسحب وش الجلياط والبسه وجيب الراجل من فوق لتحت وطجن له فى الكلام واقلب بوزك وامشى عادى جدًا، صحبك اللى رايح تترازل عليه وتستلف منه لو اعتذر لك بأى شكل هوب نط فى الجلياط وسبغ له وعامله معاملة قرود البابون".

وقالت "ش الصعبانيات، متلون كده وحاجة شغل فنادق وبيجيب ناس كتيرة سكة، الوش اللى بتلبسه علشان تخرط بصل على قلوب خلق الله وتبرك على عصفورة احساسهم وتخليهم يحلوا الكيس لحد ما يدوك اللى لا كان ليك على بال ولا خاطر.. بداية بقى من السنيورة اللى بتتجهز وناقصها يادوب الكيتشن ماشين والصينى والنيش ورفايع تبتدى بالمكنسة الكهرباء وتنتهى بقمع الكريم شانتيه، ومرورًا بالفلق اللى فى منتصف العشرينات وعيان بالصحة ويجيب علبة دوا إسهال وروشتة طفل بيسنن ويدعى أمراض الدنيا علشان تساهم فى علاجه".

وذكرت "فيه عادة حبة وشوش تانية بتخليهم معاك فى الهاند باج كده، تستخدمهم وقت اللزوم، مش لازم تبقى لابسهم طول الوقت زى الوشوش اللى فاتت؛ وش المزايدة، وش التجرمة،وش التحرش، وش الكلاحة، وش أنا ابن اسم الله وأنتو ولاد يعلم الله، وش أنا الوحيد اللى بفهم فى وسط القطيع، وش أنا أنبر إذا أنا موجود".

وممكن تلبس الوشوش دى كلها فوق بعضها وبمنتهى الكلاحة تلبس وش الورع الإيمان المزيف علشان تخلى الكل ينصاع لكل بلاويك وأنت البعيد أبعد ما يكون عن الوش اللى أنت ضاربه.

واختتمت "تفتكروا لو حصل فى لحظة إن كل الأساتك اللى فى الدنيا هرهرت ووقعت الأقنعة من على وشوش البعض وشفنا الكل على حقيقته لمدة خمس دقايق، ممكن حياتنا تكمل عادى بعد اللحظة دى؟ ما افتكرش.. والله زى ما بؤلك كده".