El Radio 9090 FM
#
أحمد صلاح حسنى فى «الراديو بيضحك»: إحنا لما بنقع بنعرف نقوم تانى

أحمد صلاح حسنى فى «الراديو بيضحك»: إحنا لما بنقع بنعرف نقوم تانى

قال أحمد صلاح حسنى إن اختيارات أجيرى السيئة كانت السبب فى خروج المنتخب الوطنى من بطولة أمم إفريقيا، والتى أقيمت بمصر.

أحمد صلاح حسنى وفاطمة مصطفى

وأضاف صلاح حسنى الذى حل ضيفا على برنامج "الراديو بيضحك"، على الراديو 9090، مع الإعلامية فاطمة مصطفى، مساء اليوم الثلاثاء: "صعبان عليا اللاعبين وعتابى ليهم أنهم فى آخر 5 دقائق من ماتش جنوب إفريقيا، لقيت مفيش حماس أو روح، مفيش غير طارق حامد بس اللى كان مموت نفسه فى الملعب".

وتابع كلامه: "اللى حصل كان رسالة ولازم نشوف حل للمشاكل اللى عندنا، وإحنا لما بنقع بنعرف نقوم تانى وإن شاء الله هناخد البطولة دى أكتر من مرة".

ووجه صلاح رسالة للجمهور: "لازم تروحوا الماتشات اللى فاضلة علشان البطولة دى باسم مصر".

وعبر عن سعادته بالاشتراك فى بطولة فيلم "الممر"، مشيدا بمجهود الفنان أحمد عز، والمنتج هشام عبد الخالق.

وأضاف صلاح حسنى الذى حل ضيفا على برنامج "الراديو بيضحك"، على الراديو 9090، مع الإعلامية فاطمة مصطفى، مساء اليوم الثلاثاء: "الفيلم بيقوم حاليا بجولة خارج مصر وبسبب ظروف خاصة بى مش موجود معاهم، والجولة دى مهمة علشان الناس برة تشوف الفيلم والجولة دى هاتفيده جدا".

أما عن مشاركته مع ياسمين صبرى فى مسلسل "حكايتى" والذى عرض خلال شهر رمضان، قال: "ياسمين إنسانة محترمة وربنا كافئها بنجاح المسلسل وبالورقة والقلم العمل نجح ونال إشادة الجمهور والنقاد".

وأضاف: "كلنا كنا قلقانين من ياسمين صبرى خصوصا أنه أول بطولة مطلقة، ولكنه القلق الطبيعى، وأنا شفت القلق ده من الفنان عادل إمام لما اشتغلت معاه، والحمد لله ربنا وفقها ووفقنا والمسلسل نجح".

ووجه صلاح حسنى الشكر للشركة المنتجة للمسلسل "سينرجى" والمخرج أحمد سمير بعد اختياره لبطولة العمل: "اختيارى كان مجازفة لأن شكلا وموضوعا شكلى ماينفعش أعمل رومانسى ولكنهم جازفوا ونجحوا فى التحدى والدور علم مع الناس".

يذكر أن الراديو 9090 قام بتكريم أحمد صلاح حسنى قبل بداية حلقتة الليلة من برنامج "الراديو بيضحك"، بعد تألقه فى فيلم "الممر"، ومسلسل "حكايتى".