El Radio 9090 FM
#
الراديو بيضحك .. مجدى الهوارى : رهانى على محمد هنيدى طلع صح

الراديو بيضحك .. مجدى الهوارى : رهانى على محمد هنيدى طلع صح

كشف المخرج مجدى الهوارى سبب تفكيره فى الاتجاه للمسرح من خلال "كايرو شو" المنتجة للعديد من المسرحيات مؤخرا، منها "3 أيام فى الساحل" للنجم محمد هنيدى.

مجدى الهوارى حل ضيفا اليوم، على برنامج الراديو بيضحك، الذى يذاع على الراديو 9090 من تقديم الإعلامية فاطمة مصطفى.

وقال مجدى الهوارى إن تفكيره فى "كايرو شو" بدأ منذ عام تقريبا، ورأى أنه الوقت المناسب للتركيز مع المسرح.

وأضاف: "فكرت إزاى نرجع الجمهور من تانى من خلال مسرح شبه مسرح برودواى ونستقطب النجوم، واكتشفت أن فيه ناس وعمال فى شغالة المسرح ماتت أو اعتزلت بعد اختفاء المسرح من فترة طويلة، فبدأت أحاول أرجع الناس اللى كانوا شغالين مسرح من جديد".

وواصل كلامه: "قررت ابدأ المشروع بالفنان محمد هنيدى صاحب الشعبية والنجومية الكبيرة بين الجمهور، ورهانى نجح".

وأكد أن عروض "كايرو شو" أعادت جيل بأكمله للمسرح، بعد فترة من ركود المسرح فى مصر.

وقال مجدى الهوارى: "كان لازم نطلع بشكل مختلف والأفكار تكون برة الصندوق علشان نقدر نجيب جمهور، لأن فيه جيل بحاله مايعرفش يعنى إيه مسرح".

وأضاف: "راهنت على الجمهور الواعى، خصوصا أن الناس كلها بتتفرج على عروض عالمية ومسرح على الإنترنت، وكان لازم نقدم تفاصيل مختلفة علشان الجمهور دلوقتى بقى واعى وفاهم، وبيقارن بين العروض هنا والعروض العالمية".

وتابع كلامه: "فيه مفاجأة قريب إن إحنا هانعرض فى الداون تاون بعد ما عرضنا فى أكتوبر والتجمع".

وأكد أن العالم الآن يتجه للمنصات والتطبيقات الرقمية.

وقال الهوارى: "بتابع المنصات الرقمية وخصوصا نتفيلكس، لأن لازم نشوف ونتفرج ونتعلم، وعلشان كده فيه عندى حاجة مختلفة قريب وهنقدم حاجة شبه ليالى الحلمية أونلاين".

وتابع كلامه: "لازم نواكب التطور اللى بيحصل فى العالم، وتقريبا الكل بقى بيتفرج على الأفلام والمسلسلات على المنصات الرقمية، ولازم نقدم محتوى يواكب التطور ده".