El Radio 9090 FM
#
منى الشاذلى تتحدث فى الراديو بيضحك عن بناتها: أنا أم غير ديمقراطية

منى الشاذلى تتحدث فى الراديو بيضحك عن بناتها: أنا أم غير ديمقراطية

تحدثت الإعلامية منى الشاذلى عن أسرتها وأسلوبها فى تربية بناتها لأول مرة، وذلك خلال حلولها ضيفة على برنامج "الراديو بيضحك"، مع الإعلامية فاطمة مصطفى على الراديو 9090.

أوضحت الشاذلى، أن لديها 3 بنات، أكبرهن أنهت دراستها الجامعية، ولا يزال لديها توأم فى المدرسة، مشيرة إلى أنها أم صارمة للغاية فى تربيتها لهن، قائلة: "الأم والأب مش مفروض يكونوا ديمقراطيين فى التربية، أنت ربنا مستأمنك على طفل صغير يبقى ديمقراطية إيه مع طفل أو مراهق، فى أساسيات الأم والأب هم الحراس على تعليمها لأولادهم".

أكدت الشاذلى أن أسرتها هى الأساس والواجب المقدس الأول فى حياتها، ويأتى بعد ذلك عملها ونجاحها، قائلة: "أنا بيتى الأساس وشغلى هو اللى جنب بيتى، بتخانق مع جوزى طبعا لأن هو الحنين وأنا اللى بشد عليهم.. لازم نربى ولادنا إن مش كل طلباتهم مجابة لازم يفهموا إن كل حاجة ليها وقت وأوان حتى لو نقدر نعملها دلوقت".

وشددت الإعلامية منى الشاذلى على أنها تتعاطف بشدة مع كل أم عاملة، لأنها تدرك مدى الصعوبة التى تواجهها للتوفيق بين كل هذه الأشياء، موضحة أن الجمع بين النجاح الشخصى والمهنى أمر صعب للغاية، قائلة: "أصعب 3 حاجات فى الدنيا على أى ست، إنك تبقى ناجحة وعلى رأس عملك، وإنك تحافظى على أسرتك وبيتك وأولادك فى تربية أنت ضميرك راضيها، وتالت حاجة واللى هى الأصعب من ده كله إنك تجمعى الاتنين مع بعض وتحافظى على أسرتك ونجاحك".

 

فى نفس السياق، أكدت الشاذلى أنها فى حياتها العادية مثل أى "ست مصرية أصيلة"، مشغولة طوال الوقت بالتوفيق بين أسرتها وعملها، كى تنجح فى كليهما سويا، موضحة أنها مع أسرتها لا تكون بنفس المظهر الذى تتواجد به على الشاشة، قائلة: " أنا زى أى ست مصرية أصيلة عندى أسرة وأطفال وشغل فى جزء كبير منه منافسة وملوش مواعيد، لذلك أنا بتعاطف مع أى امرأة ناجحة فى شغلها وبيتها، ومش تعاطف أنثوى لا ده تعاطف موضوعى".

تابعت: "لكن بطمن كل فتاة وست إن اللى شايفنى بيه ده نتيجة مجهود كبير جدا وإن الرونق اللى على الشاشة ده جزء من الشغلانة أصلا، لازم نبقى طالعين بشكل لائق فكريا ولغويا وشكليا، إنما أكيد أنا فى الأجازات مش زى فى التليفزيون نهائى.. بيبقى الشعر ملموم والدنيا عملية جدا زى أى ست فى البيت".

وعن سبب أناقتها الدائمة، أجابت منى الشاذلى بأن نشأتها فى طبقة متوسطة هى السبب فى ذلك، قائلة: "هعتبرها مجاملة لطيفة منكم بس أنا اتربيت كده، أنا ابنة الطبقة المتوسطة اللى جزء كبير جدا من تكوينها الاحترام شكلا ومضمونا وأداء، مليش فضل فى ده، ده بيعبر عن نشأتى والطبقة الاجتماعية اللى أنا جاية منها وعن مفهومى للحياة".

 

اختتمت حديثها قائلة: "أنا لا موديل ولا ممثلة ولا نجمة ومش مطلوب منى فى أى محفل إنى أنافس بالشكل والمظهر والقوام دى مش منطقتى، منطقتى إن لما أقعد مع المشاهد أحترمه، بشوف النجومية فى ده، الشكل مش من أولوياتى بالعكس بحس إن الناس بتنتقد شوية إن مظهرى كلاسيكى ومفيهوش حاجة مبهرة وأنا مش زعلانة من ده لأن بالنسبة لى الإبهار يمكن فى مناطق أخرى".