El Radio 9090 FM
#
لسه لينا كلام.. وفاء عامر توجه نصائح للشباب المقبلين على الزواج

لسه لينا كلام.. وفاء عامر توجه نصائح للشباب المقبلين على الزواج

أذاع برنامج "لسه لينا كلام" الذى يقدمه إيمان مختار ورامى الحلوانى على الراديو 9090، حلقة جديدة، اليوم الاثنين، وتناولت تريند "إلغاء القايمة" قبل الزواج ومشاكل تجهيزات الفرح.

ولقت الحلقة تفاعلا كبيرا من جمهور المستمعين، وتلقوا مكالمات من العديد من المستمعين ومن بينهم الفنانة وفاء عامر التى قدمت عدة نصائح للشباب المقبلين على الزواج.

وقالت إيمان مختار: "الجواز يبقى حلو لما يبقى معايا راجل محترم بيحبنى وشايلنى على راسه ومخلى أهله بيحترمونى وعاوز يساعدنى وبيصرف عليا، الجواز حلو لما يبقى الاتنين صحاب"، مضيفة أن العديد من الجوازات فشلت بسبب تدخل الأهل فى المشاكل بين الأزواج.

من جهتها، قالت الفنانة وفاء عامر: " دلوقتى لازم البنت والولد يعيشوا على قدهم ويفكر فى الشخص المناسب على قده، والمفروض من بداية الاتفاق يقولوا لبعض كل حاجة وميسيبوش العشم ياخدهم أوى فى الطموح والأحلام، يعنى مثلا لو حمات الولد أو البنت لو فكرت يبقى فيه كل حاجة فى البيت، مش هيبقى فيه حاجة عزيزة على الشباب، مش هيبقى عاملين حسابهم إنهم يتعبوا علشان يشتروا حاجة مهمة ليهم، يتعبوا علشان يشتروا تلاجة أحسن وتليفزيون حديث مثلا، مفيش حاجة بتيجى مرة واحدة وفى وقت واحد، يعنى ما نبتديش من حيث انتهى الأخرون".

وأضافت وفاء عامر: "لازم الولد والبنت يتعبوا علشان البيت بتاعهم، لأن اللى بييجى سهل بيروح سهل، لازم نتعب علشان نعمل بيت، علشان لما يتخانقوا يسألوا نفسهم هنعمل إيه فى اللى اشتريناه مع بعض وهل هنستحمل تانى سنين طويلة مع حد تانى علشان نشترى الحاجات دى، بتكون حياتهم مع بعض غالية عليهم".

وقال رامى الحلوانى: "الراجل هو ميزان الحكمة لأى مشكلة، هو رمانة ميزان البيت، لأن هو اللى المفروض يحل أى مشاكل تواجه البيت".