El Radio 9090 FM
#
أكرم حسنى لصباحك ومطرحك: أنا مش مطرب وبحاول أقدم حاجات برة المألوف

أكرم حسنى لصباحك ومطرحك: أنا مش مطرب وبحاول أقدم حاجات برة المألوف

تحدث الفنان أكرم حسنى، عن تفاصيل أغنية "لو كنت" والتى حققت ملايين المشاهدات خلال أيام فقط.

وقال أكرم حسنى، خلال مداخلة هاتفية لبرنامج "صباحك ومطرحك" المذاع على الراديو 9090، والذى يقدمه الإعلامى أحمد يونس: "من وقت ما دخلت مجال الميديا وأنا بحب اللى بعمله وبحاول أقدم حاجات برة المألوف".

وأضاف "الواحد لما بيجتهد فى حاجه بيبقى متأكد أن عمر ربنا ما هيضيع تعبه.. بس ماحدش يعرف السقف فين والنجاح هيبقى قد إيه".

وتابع "ساعات بتجيلى أفكار أغانى فبكتبها وبسيبها على جنب، أغنية (لو كنت) كنت بكتبها بصيغة المذكر وجتلى فكرة انى أحولها لدويتو ونعرف وجهة نظر الست فى (لو كنت) والست يعنى الأنوثه والدلع والجمال ومفيش زى هيفا طبعا".

وعن مجال الغناء، قال حسنى" أنا مش مطرب وصوتى مش حلو، بس ودنى موسيقيه وبعرف أقول الكلام بتقطيعه معينه.. بتعلم مزيكا صحيح ولكن ما أقدرش أصنف نفسى مطرب".

وفيما يخص الأعمال الدرامية، تابع أكرم حسنى قائلا "هنستأنف تصوير فيلم العميل صفر بعد العيد، وأوعدكم أنه هيكون حاجه مختلفه لأن كل فريق العمل تعب فيه جدا".

وأضاف "لما بشتغل مع حد بنبقى أصحاب وبيبقى فى بينا كيميا.. الصحوبيه بتطلع شغل حلو والشغل بيطلع الصحوبيه".

وعن مسلسل الوصية، قال "فكرة تقديم جزء تانى من المسلسل مطروحة ولكن على الأغلب لسه مش هتكون رمضان الجاى، طول الوقت بنتكلم أنا وأحمد أمين عشان نقدر نرتب جزء تانى من الوصية".

واختتم أنه "بعد نجاح عمل معين بيبقى نفسك تقدم جزء تانى جدا ولكن بتبقى خايف من التوقعات، وعشان كده لازم نحضر كويس أوى عشان نحافظ على نفس مستوى النجاح".